Kryetari i PD-së, Lulzim Basha, ka shkuar në Baldushk dhe ka dëgjuar problemet e fermerëve të zonës. Në një video Basha shfaq direkt, bashkëbisedimin që pati:

“Ndodhem në një zonë që quhet “Isuf Muça”, e njohur për prodhimet. Ndodhem pranë fermerëve për të parë si është gjendja e tyre. Nuk kam arritur të raportoj diçka tjetër, janë të njëjtat probleme. Është ferma e zotit Kasem Saliu. Problemi që paraqitet këtu është se uji faturohet njesoj sikur është biznesi i vogël.

Fermerët tanë detyrohen t’i hedhin prodhimet e tyre dhe kjo punë, kjo sakrificë, në vend t’iu kthehet në bekim, iu kthehet në mallkim se zhyten në borxh. Ta dëgjojmë vetë zotin Kasem."

Kasem Saliu: Jemi pesë vetë që punojmë me bujqësi. Unë kam tërë jetën me këtë punë. Në këtë serë rrit perime, domate, sallatë, kemi lopë. Por nuk kemi asnjë lloj fitimi, sepse çdo gjë është e shtrenjtë. Edhe toka që do punuar, edhe helmet edhe farërat, që nuk kanë as edhe garanci.

Jemi me minus këto tre muaj. Ai thotë se kanë punuar bujqit, por ku do të shesë bujku?! A e ke mbyllur?!

Asnjë lloj mbështetje nuk kemi marrë nga shteti, asnjëherë. Dhe për këto familjet e tjera nuk kam dëgjuar njeri të ketë marrë.”

Djali i Kasemit nga ana tjetër, tha: Rama tha se marrin subvencion ata që kanë sigurime në fshat në 6 muajt e fundit. Por kur nuk nxjerrim asgjë, si t’i paguajmë ne sigurimet?! Ndaj, s’përfituam asgjë”.