Kryeministri Edi Rama ka mohuar sot se ish-kryeministri Fatos Nano do të jetë kandidat për deputet i PS.
I pyetur nga gazetarët për ish-kryeministrin, Rama tha se ky është një lajm pa lidhje. ” ‘Fatos Nano s’ka nevojë të kandidojë, është lider historik i PS. I ka dhënë çka patur dhe tani jep me zemërgjërësi eksperiencën e tij me këshilla. Siç do bëj unë kur mos jem më kryetar. Dhe s’ka pse të bëjmë audiencë me lajme të tilla pa lidhje”, u shpreh Rama.
Në këtë mënyrë kryeministri ka hedhur poshtë thashethemet për rikthimin e Nanos në politikë. Mesa duket lideri historik i duhet Ramës si suvenir në muzeun e PS.
Kjo është tallja e radhës e Edi Ramës me ish-kryeministrin. Pak javë më parë i thuri elozhe dhe e quajti këshilltarin dhe bashkëpunëtorin e tij më të mirë për drejtimin e PS. Ndërsa sot nuk e quan të denjë as për deputet. Në këtë mënyrë Rama u tall dhe me kandidimin e Nanos disa vite më parë për kryetar shteti.