Kryetarja e LSI-së, Monika Kryemadhi thotë se ish-ministrit i LSI për Mjedisin, Lefter Koka ka vepruar në mënyrë personale lidhur me koncesionin e inceneratorëve.

Ish-ministri i LSI tashmë është mes të paditurve nga Partia Demokratike në SPAK lidhur me këtë çështje. Por Kryemadhi tha se Koka në atë kohë ndërhynte në parti për t’i mbyllur gojën zërave kundër koncesionit.

“LSI nuk mban asnjë përgjegjësi për sa i përket angazhimeve personale të secilit prej ne. Do të mbanim përgjegjësi nëse do të ishim palë. Petrit Vasili ka qenë i pari kundër edhe pse ndërhyrjet e zotit Koka kanë qenë të shpeshta në parti për të mbyllur gojën për këtë. LSI nuk bën asnjë lloj kompromisi me këdo, edhe drejtues i LSI-së qoftë ai, për të ndërtuar pasurinë apo lumturinë në kurriz të popullit shqiptar”, deklaroi Kryemadhi.