Ilir Meta është ‘zhveshur’ për pak çaste nga kostumi i presidentit, ku ia ka marrë këngës labe. I ulur gati në gjunjë dhe pranë këngëtarëve, kreu i shtetit mban iso bashkë me ta.
Gazetari Ervis Kuçi ka siguruar për BalkanWeb videon ku shfaqet Meta pranë këngëtarëve të veshur me veshje tradicionale shqiptare.
Përmes një postimi në Facebook, Meta thekson se ia morën këngës “Boria në Hekal ra”.
“Sot në Bylisin antik, në një nga kulmet e qytetërimit ilir, me dy grupet e shquara polifonike “Gjergj Arianti” dhe “Bashkimi” ja morëm këngës “Boria në Hekal ra”. Nuk do lejojmë askënd të na cënojë identitetin tonë kombëtar dhe trashëgiminë e vyer kulturore e artistike, që na bën krenar si shqiptarë.
Malet tona më të larta! 🇦🇱”, shkruan Meta.
Presidenti Ilir Meta ishte sot i pranishëm në Amfiteatrin e Bylisit, ku vlerësoi disa personalitete të shquara të artit.