Ndalimi i takimeve politike prej Komitetit të Ekspertëve për parandalimin e Covid 19 është konsideruar veprim i padrejtë dhe shkelje ligji prej kreut të PS Fatmir Mediu. Në takimin me drejtuesit e forcës politike ai theksoi se nuk do të lejojë dëmtimin e procesit të zgjedhjeve.

“Nisur nga deklarimi i grupit të ekspertëve që ndalohet takimet me më shumë se 10 veta, në ambiente të mbyllura apo të hapura, duke vazhduar pastaj në mënyrë specifike me ndalimin e aktiviteteve politike dhe të partive politike mendojmë se ky është një moment jashtëzakonisht i rëndë përsa i përket procesit zgjedhor dhe lirisë dhe mundësisë së qytetarëve për të komunikuar me politikën për të kuptuar se kush duhet të jetë vendimi i tyre në zgjedhjet e 25 prillit. Kjo është drejtpërdrejt një pengesë në procesin zgjedhor të partive politike por dhe e qytetarëve. Ne të bëjmë të mundur të bashkojmë të gjithë opozitën kundër një regjimi të korruptuar i cili do të shpërdorë çdo lloj mjeti dhe çdo lloj mënyrë për të mos lejuar zgjedhje të lira dhe të ndershme, për të kontrolluar jetën politike, për të kontrolluar shoqërinë shqiptare dhe padyshim për të manipuluar procesin zgjedhor”, deklaroi Fatmir Mediu.

Në zgjedhjet e 25 prillit republikanët priten të jenë në koalicionin e opozitës së bashkuar.