Ish-Kryeministri Sali Berisha i ka konsideruar heronj, protestuesit që prej netësh po shprehin revoltën e tyre ndaj dhunës dhe vrasjes nga Policia në Tiranë dhe në qytetet kryesore të vendit. "Heronj të pamposhtur tmerruan Edvin Kristaq Xhelatin dhe barbarët e vrasësit e tij me uniformë. Shikoni si sillen frikacakët ndaj të miturit që protestonte paqësisht shtrirë! Nderim djaloshit guximtar!" përshëndet ish-Kryeministri dhe publikon videon kur duken protestuesit.

Mesazhi i Berishës është nxitur edhe nga mesazhi i një qytetari, që i përshkruan aktin e të riut të revoltuar që shfaqet në video dhe se cili ishte ai djalë.

"Ky është Arjon Kuçuku, student ekselence në vitin e parë për Mjekësi, - tregon qytetari. - Ka fituar vendin e parë në Olimpiadën e Kimisë në rang kombëtar. Arjoni është djalë i sjellshëm dhe i fisshëm, kursesi i dhunshëm dhe aspak i denjë për të qenë nëpër biruca! Lironi Arjonin! Elitën duhet ta mbajmë në Shqipëri, me këtë sjellje po e dëbojmë jashtë! Nderim djaloshit guximtar!" thekson edhe protestuesi në mesazh