Presidenti i Republikës Ilir Meta ka marrë një dhuratë të veçantë nga Presidentja e Kosovës Vjosa Osmani, të cilën e ka ndarë me publikun. Bëhet fjalë për një dhuratë simbolike për gratë e mbijetuara nga dhuna seksuale gjatë luftës në Kosovë.

Kreu i Shtetit thotë se do ta mbajë në zyrën e tij si dëshmi të dhimbjeve e sakrificave të panumërta, që populli i Kosovës bëri për Lirinë dhe Pavarësinë duke shprehur mbështetje për Heroinat e Kosovë dhe solidaritet me rezolutën e Kuvendit të Kosovës.

“E pranova me shumë kënaqësi dhuratën simbolike të Presidentes në Detyrë të Republikës së Kosovës, Vjosa Osmani, në emër të grave të mbijetuara nga dhuna seksuale gjatë luftës në Kosovë, të cilat meritojnë drejtësi, dinjitet njerëzor dhe përkrahje sa më të madhe institucionale.
Këtë dhuratë do ta mbaj në zyrën time, si dëshmi të dhimbjeve e sakrificave të panumërta, që populli i Kosovës bëri për Lirinë dhe Pavarësinë dhe që kurrë nuk duhen harruar.

Mbështetje për Heroinat e Kosovës dhe për fuqizimin e rolit të gruas shqiptare në përgjithësi. Solidaritet të plotë me Rezolutën e Kuvendit të Kosovës, që dënon gjenocidin serb të ndodhur në Kosovë. 🇦🇱❤️🇽🇰”, deklaron Meta.