Gentian Trenova - replikat në komente
Gazetari Flamur Vezaj është përfshirë në një debat me replika në rrjete sociale me prokurorin Gentian Trenova, përgjegjës për dosjen 184 në Dibër dhe përgjimet e “famshme” që u publikuan nga gazeta gjermane BILD.

Vezaj i kërkon “llogari” prokurorit Trenova se pse nuk veproi kur konstatoi vjedhjet e votave, teksa ky i fundit i thotë se as drejtësia e vjetër, as e reja dhe as ndërkombëtarët nuk e dëshironin hetimin e kësaj dosjeje.

Dosja 184 (e Dibrës) së bashku me atë 339 (e Durrësit) janë dy dosjet që kanë bërë shumë bujë në vendin tonë, pasi bëhet fjalë për përfshirje të zyrtarëve dhe politikanëve në manipulime dhe blerje votash.

Ditën e sotme Prokuroria e Dibrës ka përfunduar hetimet për dosjen 184 dhe ka marrë të pandehur 4 persona me akuzën për “shpërdorim detyre” dhe “kanosje të zgjedhësve”. Çështja është pushuar për të hetuarit e tjerë për shkak të tejkalimit të afatit 3-vjeçar.