Presidenti i Republikës, Ilir Meta ka shprehur ngushëllime për ndarjen nga jeta të poetit Lefter Çipa. Në një mesazh ngushëllues në Facebook, Kreu i Shtetit thotë se Çipa na la të gjithëve një trashëgimi të vyer artistike e kulturore.

meta-cipa
Ndër të tjera, Kreu i Shtetit thote se Lefter Çipës i jeton poezia, i jeton kënga, i jeton shpirti kuqezi!

“Dhembje e trishtim nga lajmi, që nuk do donim ta merrnin kurrë, legjenda e poezisë dhe e polifonisë shqiptare, Nderi i Kombit, Lefter Çipa, u nda sot prej nesh.

Krijuesi brilant i Bregut, me frymëzim thellësisht kombëtar, iku në përjetësi, për të na lënë të gjithëve një trashëgimi të vyer artistike e kulturore, ku spikatin perlat e polifonisë shqiptare të krijuara mjeshtërisht prej tij dhe që do këndohen në jetë të jetëve, sa të ketë shqiptarë.

Familjes Çipa, komunitetit të dashur të Pilurit kuqezi, gjithë poetëve dhe polifonëve, ju përcjell ngushëllimet më të ndjera për këtë humbje të pazëvendësueshme, që na lëndoi të gjithëve.

Lefter Çipës i jeton poezia, i jeton kënga, i jeton shpirti kuqezi! I paharruar kujtimi i tij!”, shkruan Presidenti