Duket se e gjithë vija bregdetare e Shqipërisë duhet të jetë sa më shpejtë e “pastër”, për të ashtuquajturit “investitorë strategjikë” të paracaktuar nga kryeministri Edi Rama për të ndërtuar hotele dhe resorte në zonat më të lakmuara.

Në vazhdën e operacionit të madh që po nis në nisje të sezonit turistik dhe të pagëzuar me emrin kuptimplotë “Bregdeti ynë” (I kujt në fakt?!), ditën e sotme ministri i Brendshëm, Bledi Çuçi, ka njoftuar se javën e ardhshme policia e shtetit dhe IKMT do të nisë një operacion të madh, për të fshirë nga harta e pasurisë më të madhe të popullit shqiptar çdo ndërtim pa leje.

Çuçi ka shkruar se do të procedohen penalisht, nga investitorët deri tek punonjësit e kantiereve, e qoftë në radhët e vetë policisë, nga shefa e deri tek punonjës, që me veprimet a mosveprimet e tyre kanë lejuar shkeljen e ligjit.

Postimi i ministrit të Brendshëm

Shëngjin - Javën e ardhshme forcat Policisë së Shtetit dhe Inspektoriatit Kombëtar të Mbrojtjes së Territorit do të nisin operacionin "Bregdeti Ynë", për të fshirë nga harta e pasurisë më të madhe të popullit shqiptar çdo ndërtim pa leje, duke nisur me ato që janë në proces në thyerje flagrante të Kodit Penal dhe për të çuar përpara drejtësisë çdo shkelës të ligjit (qoftë në krejt zinxhirin e ndërtimit nga investitorët deri tek punonjësit e kantiereve, e qoftë në radhët e vetë policisë, nga shefa e deri tek punonjës, që me veprimet a mosveprimet e tyre kanë lejuar shkeljen e ligjit)
Pastrimi i gjithë bregdetit për të vijuar më pas me zonat e mbrojtura e akset kombëtare, do të vazhdojë pa u ndalur deri në goditjen e fundit
Apeli për shkelësit është i thjeshtë: Prishni e pastroni vetë çka keni ndërtuar pa leje në dëm të pasurisë së popullit, sepse kur të përballeni me forcën e operacionit "Bregdeti Ynë", do të jetë shumë vonë për ju