Lideri historik i PD-së Sali Berisha ka komentuar edhe njëherë tjetër shkarkimin e Enkeld Alibeajt nga funksioni i Kryetarit të Grupit Parlamentar, duke theksuar se treni tashmë nuk ndalon dhe pas përpjekjeve të ndryshme për ta ndaluar.

Berisha e quajti nul emërimin e Alibeajt nga Bardhi dhe se procedurat ligjore do të ndiqen nga grupi i ekspertëve që do të përcaktojnë procedurën e emërimit të kryetarit të ri të grupit parlamentar i cili duhet të jetë një nga nënkryetarët e partisë.

Prononcimi për mediat

Pyetje: Kur do ta prezantoni platformën për drejtimin e PD?

Berisha: Platformën, dua të jem i hapur, sapo ta kem gati!

Pyetje: Z. Berisha, Lulzim Basha u bë pjesë e Kuvendit gjatë gjithë ditës së sotme, e nisët me një dokumentar... A do të thotë kjo se nuk ka një amnisti të Sali Berishës në drejtim të Lulzim Bashës?

Berisha: Ka një amnisti, pa asnjë diskutim. Nuk ka një përjashtim, por realitetet janë realitete. Ky tren nuk ndalon, u provua tashmë. U bënë përpjekje nga më të ndryshmet që ta ndalojnë, por treni ecën drejt fitores.

Pyetje: Kush do ta drejtojë Grupin Parlamentar të PD, zoti Berisha?

Berisha: Sot u mor një vendim ndaj personit të emëruar nga Gaz Bardhi dhe ai në atë detyrë është nul. Procedurat ligjore do të ndiqen nga grupi i ekspertëve që do të përcaktojnë procedurën e emërimit të kryetarit të ri të grupit parlamentar i cili duhet të jetë një nga nënkryetarët e partisë.

Pyetje: Nëse zoti Alibeaj thërret mbledhjen e deputetëve, do të merrni pjesë?

Berisha: Këto ditë kam përparësi disa mbledhje të tjera, por ai sot është i shkarkuar nga çdo funksion dhe natyrisht do të ndiqen procedurat.