Kathimerini citon deklaratën e Berishës në SYRI TV: Arrestimi i Fredi Belerit u inskenua nga SPAK

E mërkurë, 25 October 2023 10:52

Gazeta e njohur greke, Kathimerini, i ka bërë jehonë deklaratave të kreut të opozitës, Sali Berisha në SYRI TV për çështjen e Fredi Belerit.

Gazeta shkruan se Berisha është shprehur se arrestimi i Belerit dhe gjykimi i tij i mëpasshëm janë inskenuar nga policia dhe Prokuroria Speciale.

Përveç kësaj, Berisha la të kuptohej se pas çështjes qëndronte Edi Rama, kryeministri i Shqipërisë.

Berisha tha se kjo gjë e çoi Shqipërinë në një konfrontim me fqinjët tanë.

Në intervistën për SYRI TV, Berisha tha ndër të tejra se personi i përdorur nga policia për rastin e Belerit është paguar rreth 7 mijë euro nga fondet sekrete të policisë.

“Ky person quhet Arsen Rama,” tha Berisha, duke i cilësuar si skandaloze veprimet e policisë.

Berisha tha se drejtori i Policisë së Vlorës dhe kreu i Departamentit të Hetimit Kriminal në Policinë e Shtetit kanë vepruar në kundërshtim me ligjin dhe qarkoren e Ministrisë së Brendshme për menaxhimin e fondeve sekrete.

Për pasojë, Berisha tha se këto parregullsi e bëjnë të pavlefshme dëshminë e Arsen Ramës në gjykatë.

Kujtojmë se Greqia ka shprehur vullnetin për të bllokuar disa nga fondet e para-anëtarësimit të BE-së për Shqipërinë, ndërsa nuk mungojnë sugjerimet për masa më të ashpra.