Një kompani në pronësi të fshehtë të drejtuesve të Bashkisë së Tiranës, manipuloi thirrjet për tendera për t’u pasuruar vetë... Një skemë klasike, por që godet kryebashkiakun e kryeqytetit shqiptar, Erion Veliaj, pranë kryeministrit Edi Rama 

Kompania quhet 5D Konstruksion. Ajo fitoi prokurime të shumta për tenderat e nisur nga Bashkia e Tiranës, duke grumbulluar miliona euro. Pronari ligjor i saj ishte një bukëpjekës nga Tirana, i cili merrte rrogë nga kompania “e tij”, e cila në realitet i përket dy drejtorëve të administratës bashkiake të Tiranës: Redi Molla dhe Mariglen Qato, të arrestuar javën e kaluar nga prokurorët e SPAK-ut, bashkë me gjashtë punonjës të tjerë bashkiakë.

120 faqet e dosjes së hetimit detajojnë mënyrën se si Redi Molla dhe Mariglen Qato përfitonin dividentë nga 5D Konstruksion, si dhe shkeljet e shumta të ligjit të kryera gjatë dhënies së kontratave për punë publike kësaj kompanie të sapokrijuar, pa asnjë përvojë të mëparshme në këto fusha.

Përgjimet e bisedave telefonike mes disa punonjësve të kompanisë sugjerojnë qartë se pronësia e vërtetë e kompanisë ishte një sekret i hapur, ose të paktën se kishte pak përpjekje për ta fshehur atë. Përgjimet zbulojnë gjithashtu një mjedis pune të dominuar nga konflikti dhe presioni, me punonjësit që merrnin qetësues për t'i ndihmuar të flinin, si dhe një kontroll të çuditshëm tatimor në të cilin inspektorët tatimorë “panë diçka që nuk duhej ta kishin parë”.

Sipas SPAK, suksesi i 5D Konstruksion është për shkak të pozicionit të pronarëve të tij sekret. Kompania ka fituar shumë tendera të nisur nga Bashkia e Tiranës, por asnjë nga institucione të tjera publike nën kontrollin e Partisë Socialiste.

Erion Veliaj në zemër të skandalit

Nga hetimi rezulton gjithashtu se paratë e mbledhura në këto tendera të montuar, të ardhura nga taksapaguesit shqiptarë, janë investuar në pasuri të paluajtshme, përfshirë ndërtesa banimi dhe një hotel në Durrës. Megjithatë, për këtë hotel kompania përfitoi një status të posaçëm përjashtimi nga taksat, të dhënë nga qeveria e kryeministrit socialist Edi Rama. Sipas një bisede të përgjuar nga një punonjës i 5D Konstruksion, kryebashkiaku i Tiranës, Erion Veliaj, është vetë një aksionerët e fshehur pas hotelit të Durrësit.

Do të ishte “naive të besohej se kryebashkiaku Erion Veliaj nuk ishte në dijeni të kësaj afere”, tha gazetarja Ola Xama në Lapsi.al. “Përgjegjësia e tij e parë qëndron në pozicionin e tij duke e bërë atë mbajtës të autoritetit kontraktor për tetë thirrjet për tenderat e dhëna për kompaninë 5D Konstruksion”.

“Sido që ta ktheni këtë histori, ose përfitimet e paligjshme janë bërë me bekimin e tij ose institucioni që ai drejton ka dështuar. Në rastin më të keq është bashkëpunëtor, në rastin më të mirë është i paaftë për të drejtuar bashkinë”.