Në Ditën Botërore të Mjedisit, Presidenti Ilir Meta nëpërmjet një postimi në faqen e tij “facebook” u bën apel të gjithë qytetarëve shqiptarë për mbrojtjen e pasurive kombëtare. Meta e ka shoqëruar postimin e tij me një foto me të birin, të cilin e ka zgjedhur të përçojë mesazhin se kujdesi ndaj mjedisit është përgjegjësia ndaj gjeneratave të ardhshme.

Statusi i plotë i Presidentit Meta:

Sot në Ditën Botërore të Mjedisit, dua të bëj një apel mbi nevojën për t’u angazhuar të gjithë që pasuritë kombëtare, të shfrytëzohen me racionalitet, në funksion të mbrojtjes së mjedisit dhe zhvillimit ekonomik të qëndrueshëm të vendit.

Të kontribuojmë të gjithë për një mjedis më të pastër e më të shëndetshëm, të ruajmë resurset tona të jashtëzakonshme, pyjet, lumenjtë, florën e faunën dhe të orientohemi drejt produkteve bio, si mënyra më e mirë për të jetuar shëndetshëm e për të promovuar e mbrojtur bukuritë natyrore.

Kujdesi ndaj mjedisit është përgjegjësia jonë ndaj gjeneratave të ardhshme.