Duke u mbështetur te fluksi i madh i qarkullimit të makinave në aksin Maminas-Gjiri i Lalëzit përgjatë sezonit turistik, policia e Durrësit ka ndërmarrë një sërë masash për parandalimin e aksidenteve rrugore dhe rritjen e parametrave të sigurisë  rrugore.

Në njoftimin për mediat, bëhet e ditur se në afërsi të vendit të quajtur "Akullorja" në Armath ditën e sotme janë vendosur kone provizore plastike, të cilat janë fiksuar në asfalto betonin e rrugës.

Ndër të tjera, policia bën thirrje qytetarëve të mos ndalojnë në këtë zonë pasi në të kundërt do të ndëshkohen sipas Kodit Penal.

Njoftimi i Policisë së Durrësit:

Në aksin rrugor Maminas - Gjiri i  Lalëzit, nisur nga fluksi i madh i mjeteve që qarkullojnë  në këtë segment, kryesisht gjatë sezonit  veror,  nga ana e Sektorit të Policisë Rrugore në bashkëpunim me Entin Kombëtar Rrugor, firmën kontraktuese për mirëmbajtjen e këtij aksi rrugor dhe Bashkinë Durrës, më qëllim parandalimin e aksidenteve rrugore dhe rritjen e parametrave të sigurisë  rrugore  janë marrë masat e nevojshme për përmirësimin e infrastrukturës dhe pajisjen me sinjalistikën e duhur.

Konkretisht, në afërsi të vendit të quajtur ‘Akullorja’ në Armath ditën e sotme janë vendosur kone provizore plastike, të cilat janë fiksuar në asfalto betonin e rrugës.

Policia Rrugore kërkon mirëkuptimin e të gjithë përdoruesve të rrugës që në fundjavë, ditën e shtunë dhe të diel, nga ora 15:30-22:00, në vendin e quajtur "Akullorja" të mos ketë ndalim të mjeteve në karrexhatë dhe parakalime të mjeteve në këtë vend, si edhe  heqja apo dëmtimi i sinjalistikës rrugore do të ndëshkohet sipas Kodit Penal