Ricard Sebastian Bal, i riu nga Suedia i cili më 13 gusht u kap në doganën e Muriqanit duke transportuar 19 pistoleta në një çantë me veshmbathje ka dalë sot para gjyqit dhe është njohur me masën e sigurisë ‘arrest me burg’.
Në dëshminë e tij, i riu ka deklaruar se nga Shqipëria për në Suedi do të bënte vetëm transportin e pistoletave dhe se nuk e njihte personin që ia kishte dorëzuar.
“Kam qëndruar katër ditë në Prishtinë dhe kam marrë armët nga një person që nuk ia dija emrin dhe do t’i çoja në Suedi. Të gjitha këto i bëra për para sepse isha i papunë. Doja të studioja por s’kisha lekë dhe kreva këtë akt”, tha ai. 21-vjeçari nga Suedia udhëtonte si pasagjer në autobusin e linjës “Kosovë-Gjermani”. Në çantën e tij, u gjetën 19 armë zjarri tip “pistoletë”, të gjitha të kalibrit 7.65.
