I gjithë vendi po përjeton një situatë të acaruar politike,  por  jo vetëm, për shkak të vendosjes së një takse të pajustifikuar në Rrugën e Kombit. Si të mos mjaftonte kjo dhe planet e Ramës për të bërë të tjera rrugë me pagesë, edhe Kisha Françeskiane në zonën e Kepit të Rodonit ka vendosur të taksojë rrugën turistike.

Kisha pretendon se rruga që të çon në zonën turistike të Kepit të Rodonit, është në pronësi të saj. Kjo ka sjellë reagimin e banorëve të Ishmit, të cilët kanë dalë në protestë. Ato kanë kundërshtuar tarifimin e rrugës, pasi nëpërmjet saj ato nuk shkojnë vetëm për të pushuar në zonën e plazhit, por edhe në punë apo tek të afërmit e tyre. Ata thonë se krahas tarifës hyrëse prej 100 lekë të reja, kisha i detyron ata të paguajnë edhe 200 lekëshin e parkimit. Banorët thanë se i janë drejtuar prokurorisë me një kërkesë, ndërsa kanë dërguar peticione të vazhdueshme institucioneve për heqjen e traut dhe tarifave për banorët. Të penalizuar janë edhe turistët, apo besimtarët të cilët shkojnë në Kishën e Shën Ndout, që ndodhet tek Kepi i Rodonit, për të kryer ritet fetare.

A janë këto institucione, në dukje të pavarura nga pushteti politik , duke përkrahur një politikë “serbe” që po aplikohet në vend nga qeveria, apo mungesa e fondeve dhe investimeve në zonat turistike të vendit, detyron edhe këto institucione të mbledhin para për të mirëmbajtur këto zona.