Krimi i organizuar shqiptar është një fenomen shqetësues pothuajse në të gjithë Evropën.

Sot, kanë qenë mediat spanjolle ato që kanë ngritur alarmin për sa i përket forcës së krimit shqiptar në trafikimin dhe shfrytëzimin e prostitucionit.

Sipas statistikave të publikuara së fundmi nga mediat spanjolle, shqiptarët janë të dytët për sa i përket numrit të të arrestuarve për shfrytëzim prostitucioni në Spanjë.

Madje dhe sot në Ditën Evropiane Kundër Trafikimit të Qenieve Njerëzore, policia spanjolle thotë se ka realizuar gjithsej 536 operacione kundër shfrytëzimit seksual, duke çuar në pranga 1,219 njerëz, kryesisht nga Spanja, Shqipëria, Nigeria dhe Kina.

Të dhënat vijnë ndërsa në Spanjë u organizua një tjetër operacion sot në bashkëpunim me Europol, duke shkatërruar një rrjet kriminal i dedikuar për trafikimin e personave me qëllim shfrytëzimin, duke çuar në pranga 15 persona.

Arrestimet u realizuan në tri provinca spanjolle: tetë prej tyre në Palma de Mallorca, pesë në Alicante dhe dy të tjerë në Las Palmas de Gran Canaria. Agjentët gjithashtu kanë liruar pesë viktima të cilët ishin të detyruar të paguajnë një borxh prej 35,000 euro.