Banka Botërore nuk ka pranuar që të financojë rehabilitimin e rrugës Tiranë-Durrës.

Ministria e Infrastrukturës dhe Energjisë ka bërë me dije se ndërhyrja do të bëhet me fondet e buxhetit të shtetit por ende nuk dihet se nga kush do të realizohet rialokimi i fondeve. 

Nga përllogaritjet e para rezulton se riasfaltimi kërkon 11 milion euro ndërsa ndërhyrja në total shkon deri në 30 milion euro.

Rruga është si pjesë e kontratës së mirëmbajtjes në kuadër të projektit me BB. Por duke qenë se rrugës nga 2001 deri më tani nuk i është kryer mirëmbajtje e thellë përveç segmentit rrethrrotullim shqiponje-kthesë e Rinasit, është degraduar. 

Rrjedhimisht Banka nuk e financon dot ndërhyrjen e thellë në shtresat e rrugës dhe projekti i ndërhyrjes do të përshtatet tashmë dhe do llogaritet të mbulohet me buxhet shteti. 

Ndërhyrja në këtë rrugë ka shumë gjasa të shtyhet duke qenë se fondet do të merren nga buxheti i shtetit, ndërkohë që vetëm pak kohë më parë ministri i Infrastrukturës dhe Energjisë premtoi se do të ndërhyhej në pranverë për riasfaltim.