Një tjetër rast dhune ndaj gazetarëve është denoncuar nga deputetja e PD, Albana Vokshi.

Mbrëmjen e djeshme është dhunuar gazetari Ismet Drishti, administrator i Tv Zjarr është sulmuar nga disa persona të maskuar. Ata e kanë goditur me levë dhe menjëherë pas ngjarjes ai ka kërkuar ndihmën e policisë.

Si gjithmonë në të tilla raste policia ka shkuar me vonesë.

Sikur të mos mjaftohej me këtë fakt policia nuk ka nisur asnjë hetim për këtë çështje.

Ja postimi i Vokshit:

Administratori i “TV Zjarr”, gazetari Ismet Drishti, është kërcënuar nga një grup me maska, që ka sulmuar me leva dhe sende të forta ndërtesën e studiove të televizionit.

Gazetari Drishti ka kërkuar ndihmën e policisë, por patrulla e parë policore ka mbërritur shumë vonë. Në përpjekje për të mbrojtur pronën dhe punën e tij, gazetari Ismet Drishti është përleshur me agresirët dhe ka pësuar lëndime të lehta në kokë.

Në 4 dhjetor të 2017, studiot e televizionit Zjarr u sulmuan dhe u plaçkitën natën, ndërsa policia ende nuk ka asnjë të ndaluar.

Edhe sot, policia nuk ka bërë asnjë veprim për të sekuestruar kamerat e bizneseve përballë studiove të televizionit për të rënë në gjurmë të agresorëve.

Partia Demokratike e dënon me forcë sulmin ndaj gazetarit Drishti dhe kërkon hetim të plotë e të shpejtë për ngjarjen e përsëritur kundër gazetarit Ismet Drishti, i njohur për qëndrinet kritike ndaj qeverisë.

Partia Demokratike ka nisur procesin e konsultimeve me shoqatat e gazetarëve dhe organizatat ndërkombëtare për hartimin e një rezolutë parlamentare në mbrojtje të jetës dhe profesionit të gazetarëve ne Shqipëri.