Gjermania zhvillon sot zgjedhjet për këshillat bashkiak, ndërsa mes kandidatëve ka edhe shqiptarë. Aneta Wolter është njëra prej tyre, e cila kandidon në siglën e CDU në bashkinë Lubeck.

Në një lidhje direkte për Ora News, ajo u shpreh optimiste për fitoren e saj.

Aneta Wolter: Shpresoj që kësaj radhe të kemi rezultate të mira në zgjedhjet lokale dhe ekzistojnë dy mundësi për tu futur në këshillin bashkiak. E para nëse fitohet direkt një zonë, ose përmes listës. Zona ku unë kandidoj është zonë social demokrate, por shanset i kemi që ta marrim këtë zonë direkt. Është edhe shansi përmes listës që është shumë i madh.

Ajo tha se përfaqësimi i shqiptarëve në rang lokal është shumë i rëndësishëm. Wolter tha se sa më shumë të jemi aktiv në politikën gjermane aq më shumë mund të marrim influencë mbi vendimet që do të merren për Shqipërinë.

Aneta Wolter: Përfaqësimi është shumë i rëndësishëm. Pa angazhimin e njerëzve nuk funksionon demokracia, kjo është kaq e rëndësishmne edhe për politikën shqiptare në Shqipëri me të cilën ne jemi të lidhur.  Gjermanët kur marrin një vendim për Shqipërinë i marrin në strukturat demokratike, për shembull në Bundestag dhe sa më shumë të jemi aktive në politikën gjermane aq më shumë mund të marrim influence mbi vendimet që do të merren për Shqipërinë qoftë nga Gjermania qoftë nga Brukseli.

Aneta Wolter: Shqiptarët janë një grup jo shumë i madh dhe jo një temë e rëndësishme sa i përket temës së emigracionit. Kemi grupe të tjera popujsh që trajtohen në kontekstin e emigracionit. Deri në 2015 kemi qenë 20-30 mijë shqiptarë dhe ne jemi 10% e shqiptarëve sepse pjesa më e madhe janë shqiptarë të Kosovës. Çfarë ka ndryshuar për shqiptarët është fakti që nga 2016, parlamenti shqiptar i dha mundësi shqiptarëve që nëse kanë një kontratë pune ata mund të vijnë në mënyre legale në Gjermani. Do ti thoja shqiptareve se nëse janë të kualifikuar dhe dinë gjuhën  i kanë shanset të vijnë në mënyrë legale.