Thuajse secili prej nesh ka mesatarisht 80 aplikacione në telefonin e tij edhe pse mund të përdorë vetëm gjysmën e tyre. Nëse në vitin 2008, aplikacionet ishin një treg thuajse inekzistent, shifrat tregojnë se trendi i përdorimit dhe prodhimit të tyre është rritur në mënyrë të jashtëzakonshme.

Sipas aplikacionit Annie, një software që merret me analiza, në vitin 2016, kjo industri kapi vlerën 1,3 trilionë dollarë. Ndërkohë, që Annie vlerëson se deri në vitin 2021, shifrat mund të arrijnë në 6,3 trilionë dollarë, duke u shndërruar kështu në industrinë e tretë më të madhe në botë.

Dy “dyqanet” më të mëdhenj janë Apple iOS dhe Google Play Android, por shifrat më të larta të shitjeve i kap Apple store, i cili në vitin 2017 ofronte 2,8 milionë aplikacione dhe gjeneronte të ardhura në vlerën 21 miliardë. Nga vendet që përfitojnë më shumë deri më sot, Amerika dhe Kina kryesojnë listat. Por, pritet që shumë shpejt Kina do jetë vendi që shkarkon më shumë aplikacione, nisur nga popullsia 1,3 miliardë dhe nga tendenca për të transferuar para nëpërmjet aplikacioneve më shumë sesa nëpërmjet bankave.