Pronarët e iPhonëve paralajmërohen që të kenë kujdes nga një koleksion i ikonave të cilat mund t’ua bllokojnë telefonat e tyre.

Kushdo që merr këto karaktere, është në rrezik sepse nëse klikoni mbi ta aplikacioni i mesazheve që e përdorni do t’ju bllokohet.

Virusi “Pika e Zezë” punon ngjashëm me virusin “text bomb” të Whatsappit i cili fatkeqësisht ua shkatërroi Ditën Publike të Pushimit (Bank Holiday) disa njerëzve këtë javë në Britani të Madhe, shkruan “Metro.co.uk”.

Në tekst shfaqet emotikoni në formë të një “rrethi të zezë mesatar” në mes të simboleve “<” dhe “>”, me një ikonë të vogël të gishtit tregues drejtuar kah kjo vrimë e zezë me pamje ogurzi.

Nëse e klikoni atë kur vjen si njoftim, aplikacioni të cilin e përdorni për mesazhe do t’ju bllokohet dhe nuk do të mund ta rregulloni derisa ta riinstaloni.

“Boom, nëse e klikoni atëherë aplikacioni juaj i mesazheve do të bllokohet dhe do të qëndrojë ashtu për një kohë të pacaktuar”, thotë kanali i njohur në YouTube, EverythingApplePro.

Ky kanal i njohur në YouTube thotë se virusi ka prekur iPhone X-in dhe iPhone 8-shin.

Virusi “Pika e Zezë” e bllokon telefonin sepse është e mbushur me karaktere të padukshme të cilat me sa duket ngarkohen në telefon pa ndalë dhe kështu vënë presion masiv në procesorin e tij, përcjell Koha.net.

Megjithatë, Apple pritet ta rregullojë këtë në përditësimin e ardhshëm. Dërgimi i tekstit “vdekjeprurës”, po ashtu, kërkon një kohë të gjatë, që do të thotë se disa njerëz mund të mërziten duke provuar t’i bezdisin miqtë e tyre.