Se kafshët ndjejnë thellë kujdesin, por edhe dashurinë që njerëzit japin për to, këtë e kemi ditur, por që ato të ndjejnë mungesë, e madje edhe tronditje të madhe deri në mërzi për ndarjen nga jeta të pronarit të tyre, kjo është shumë befasuese, së paku për njerëzit që nuk i njohin ato.

Një rast i pazakontë ka ndodhur në qytetin e Vushtrrisë. Që nga e mërkura, kur ka ndërruar jetë Asllan Quni Kuqani, qeni i tij është duke e pritur te dera që ai të kthehet. Për as edhe një moment ai nuk është larguar nga dera e punëtorisë ku kishte punuar i ndjeri.

Për më keq, qeni i quajtur “Cuki” është tronditur aq shumë nga mungesa e pronarit, i cili është kujdesur për të plotë 13 vjet, sa tani që prej gjashtë ditësh ai as nuk po ha e as nuk po pi.