Komisioni i Pavarur i Kualifikimit,  ka reaguar ndaj lajmeve të publikuara në disa media rreth procesit të vlerësimit apo rezultatit të tij për subjekte konkretë, në të cilat është cituar si burim informacioni ky Komision.

Përmes një deklarate zyrtare, Komisioni nënvizon se asnjë rezultat i publikuar jo zyrtarisht prej tij nuk është i vërtetë dhe nuk duhet marrë i mirëqenë. Komisioni i Pavarur i Kualifikimit thekson faktin se komunikimi mbi të dhënat e procesit të rivlerësimit në përgjithësi, apo për raste të veçanta, bëhet VETËM nëpërmjet komunikimit zyrtar, siç është faqja zyrtare e internetit të këtij institucioni, koordinatori për mediat dhe/ose vendimet e trupave gjykuese mbi rastet individuale.

“Çdo informacion tjetër, i marrë jashtë komunikimit zyrtar, mbi procesin e rivlerësimit NUK është i autorizuar nga Komisioni i Pavarur i Kualifikimit dhe nuk shpreh qëndrimin e tij”, thekson në deklaratë organi kryesor i Vettingu-t

Deri tani KPK ka kërkuar shkarkimin e të paktën 2 gjyqtarëve ndërsa për njërin ka dhënë vlerësim pozitiv. Shpesh herë është ngritur pyetja: “Cilët janë njerëzit që po bëjnë Vetingun?”

Mes anëtarëve të Komisionit të Pavarur të Kualifikimit ka edhe ish-kandidatë për deputetë.

Bëhet fjalë për Roland Ilian, i cili në 2009 kandidonte për subjektin G99, që drejtohej në atë kohë nga Erjon Veliaj, dhe ishte në koalicion me socialistët e Edi Ramës. Ilia renditej i dyti në qarkun e Shkodrës në listën e partisë së Veliajt.