Kryeministri Edi Rama deklaroi se gjatë një inspektimi që bëri sot në disa tregje të Tiranës, për të parë nëse zbatoheshin masat kundër COVID-19, u has me dy probleme, të cilat kërkoi të zgjidheshin nga ministri i brendshëm Sandër Lleshaj.

Në një komunikim online me disa prej ministrave të tij, Rama porositi LLeshajn që policia të veprojë në rastet kur shohin pensionistët në rrugë.

Sipas tij, ata nuk duhet të dalin kurrësesi nga shtëpia, ndërsa paralajmëroi edhe gjoba për shkelësit e karantinës.

“Dola sot me drejtuesit e policisë. Pashë pak situatën. Situata është goxha më mirë në tregje. Kemi dy probleme që duhen adresuar me urgjencë. Pensionistët duhet të kthehen në shtëpi. Kemi folur dhe me ministren e Mbrojtjes dhe atë të Shëndetësisë për të targetuar shërbimet për pensionistët. Për pensionistët kryefamiljarë, u duhet shërbyer nga ne. Të tjerët duhen ndihmuar nga fëmijët. Policia duhet të kthejë mbrapsht çdo të moshuar në shtëpi. S’ka; ‘obobo’, ‘u më pe’. Pensionistët duhen kthyer nga rruga. Makinat e policisë që bëjnë mbikëqyrjen, s’duhet të vazhdojnë rrugën kur shohin një pensionist, por t’i thonë; ‘xhaxhi në shtëpi’. Problem tjetër që shoh është ecja bashkë. Është e ndaluar, është e e rrezikshme. Duhet të ecin tek e tek. Mund të jeni burrë e grua! Por po vazhdoi kështu, do martohen të gjithë bashkë, edhe burri me burrin. Po ecet bashkë, gjobiteni! Atyre këmbësorëve që kapen duke ecur në rrugë pas orarit, do gjobiten dhe përveç kësaj do i bllokohet makina”, tha Rama.

Kryeministri Rama sot në rrugët e Tiranës, pa asnjë masë mbrojtëse dhe i shoqëruar nga disa persona, të cilët nuk e respektojnë aspak distancën që kërkon vetë kryeministri për qytetarët: