Krydemokrati Lulzim Basha ka akuzuar kryeministrin Edi Rama dhe qeverinë se vjedh qytetarët. Basha tha në konferencën e sotme se kriza aktuale dhe që po thellohet nuk përballohet me llafe duke i kërkuar Ramës të zbatojë planin me pesë pika të PD-së për përballimin e situatës nga COVID-19.

Në të kundërt ai u zotuar se do bëjë gjithçka për ta ndëshkuar Ramën, pasi sipas tij t’u marrësh paratë qytetarëve dhe mos tua kthesh kur kanë nevojë nuk është keqqeverisje por krim.

“Cilat janë dy problemet kryesore që shkakton kjo krizë, rënie e konsumit, mbylljen e biznesit, një rreth vicioz. Këtu duhet dora e shtetit, sot duhet ndërhyrja e qeverisë për të shkuar tek njerëzit jo tek klientët e qeverisë.
Këta po bëjnë të kundërtën. Sot nuk kanë burime financiare për t’iu siguruar bukën e gojës njerëzve. Nuk kanë burime financiare për maska dhe dezinfektantë për pensionistët. Kollaj t’iu thuash njerëzve mbani maskë. Me çfarë do ta blejnë maskën. Nuk i shkon në mend për ta.
Paratë janë, por paratë po vidhen. Kriza aktuale dhe që po thellohet nuk përballohet me llafe. Kriza dhe epidemia nuk përballohet me gërr-vërre dhe gënjeshtra. I kam propozuar një plan konkret.

Kemi një kryeministër dhe një qeveri që është e vendosur të injorojë interesin dhe nevojat akute të qytetarëve dhe të vazhdojë vjedhjen. është një problem jetik për vendin dhe kërkoj një bashkim të madh shqiptarësh. Nuk pret koha deri më 25 prill, ndaj nëse këto dy javë i jam drejtuar me civilitet që të marrë planin dhe të zbatojë sot i them që mosbatimi i planit me 5 pika e ngarkon Edi Ramën me përgjegjësi jo thjesht politike por dhe penale. Çdo dëm i shkaktuar në jetë, në ekonominë e vendit nesër nuk do të jetë thjesht një problem i madh për qytetarët, përgjegjësi politike e këtyre që kemi akoma por do ndiqet me të gjitha format si përgjegjësi penale. T’iu marrësh lekët qytetarëve dhe të mos ua kthesh kur kanë nevojë, nuk është thjesht keqqeverisje, por një krim i rëndë që duhet ndëshkuar dhe zotohem se do bëj gjithçka për ta ndëshkuar. I bëj thirrje të lërë llafet, planin me 5 pika e ka gati ta bashkojë. Të ndalë pagesat korruptive dhe paratë t’i çojë urgjentisht tek njerëzit në nevojë”, deklaroi Basha