Lëvizje brenda institucionit të Presidencës.

Siç njofton kjo e fundit, ditën e sotme, kreu i shtetit Ilir Meta ka firmosur disa ndryshime në stafin e tij më të ngushtë.

Kështu, Edmond Panariti emërohet drejtor Kabineti pranë Presidentit duke zëvendësuar kështu Arben Cicin.

Ky i fundit merr detyrën e Këshilltarit Diplomatik.

Ndërkohë, le detyrën edhe këshilltari i Çështjeve të Sigurisë Bahri Shaqiri.

“Presidenti i Republikës, Sh.T.Z Ilir Meta ka pranuar sot dorëheqjen e z.Bahri Shaqiri nga detyra e Këshilltarit për Çështjet e Sigurisë Kombëtare, për shkak të angazhimeve të tij në të ardhmen, që nuk përputhen me këtë detyrë tepër të rëndësishme“, thuhet ndër të tjera në njoftim.

Njoftim i Institucionit të Presidentit të Republikës

12 nëntor 2020

Presidenti i Republikës, Sh.T.Z Ilir Meta ka pranuar sot dorëheqjen e z.Bahri Shaqiri nga detyra e Këshilltarit për Çështjet e Sigurisë Kombëtare, për shkak të angazhimeve të tij në të ardhmen, që nuk përputhen me këtë detyrë tepër të rëndësishme.

Presidenti Meta, ka emëruar Këshilltar për Çështjet e Sigurisë Kombëtare, z.Spiro Koçi, i cili deri sot ka ushtruar detyrën e Këshilltarit Diplomatik të Kreut të Shtetit.

Presidenti Meta ka emëruar Këshilltar Diplomatik, z.Arben Cici, i cili ka mbajtur detyrën e Drejtorit të Kabinetit.

Për shkak të forcimit të prioriteteve të reja të Institucionit të Presidentit të Republikës, me qëllim përballimin me sukses të sfidave, që parashtron koha, në funksion të interesit më të mirë qytetar dhe kombëtar, siç janë:

Sfidat e pandemisë COVID-19 dhe shëndetit publik,
Sfidat me të cilat përballet faktori shqiptar;
Shpopullimi i vendit,
Sfidat në Arsim,
Sfidat në Mjedis,
Kreu i Shtetit, ka emëruar sot në detyrën tepër të rëndësishme të Drejtorit të Kabinetit, Prof.Dr. Edmond Panariti.