Intelektuali i njohur kosovar, Veton Surroi reagoi në edicionin e mbrëmjes në SYRI TV për vendimin e Këshillit të Qarkut të Kukësit për t’i hequr titullin e ‘Nderit’ të qytetit.
Ai kritikoi ashpër kryebashkiakun e Kukësit, Safet Gjici.
“Nuk ka argument sepse sa pashë unë nga kronikat, sepse kështu jam informuar, në mbledhjen e Këshillit Bashkiak, dy persona që nuk i njoh kanë bërë kërkesën.
Në atë mbledhje zoti Gjici, që është kryetar i Bashkisë, të jetë ai arbitër, ai të vlerësojë se çfarë kam thënë dhe çfarë nuk kam thënë dhe a është brenda koncepteve kombëtare.
Zoti Gjici është shndërruar në historian, në studiues, në prokuror, në gjykatës dhe Bashkia është futur në situatë bizare që të bëjë vlerësime për gjëra për të cilat as ka parë dhe as ka dëgjuar.
Zoti Gjici thotë ta shkarkojmë njëherë dhe provat t’i mbledhim më vonë. Se çfarë provash janë, është e tepërt të flitet. Nuk besoj se zoti ka kapacitete të mjaftueshme se po të kishte, do lexonte librat dhe artikujt që kam shkruar se deklarimet e mia janë deklarime publike,” tha Surroi.