Kryeministri Edi Rama vazhdon të shfaqet sërish i lumtur kur është në krah të presidentit serb, Aleksandër Vuçiç. Të dy u takuan me kryeministrin maqedonas, Zoran Zaev në Bled të Sllovenisë.

Treshja është baza e asaj që njihet si Ballkani i Hapur, një nismë që Euronews e cilëson si kontroverse.
Toby Vogel, analist i Këshillit për Politikat Demokratizuese në Berlin, thotë se për tipa si Rama dhe Vuçiç, kjo iniciativë është vetëm një shfaqje publicitare për të treguar fuqinë e tyre personale, në kontrast me impotencën e BE në rajon.

“Vuçiç po tenton që të diversifikojë. Ai ka tentuar prej kohësh që të fuqizojë marrëdhëniet në rajon- në mënyrë që të mos shihet vetëm si kampioni i serbëve në rajon. Ambicia e Vuçiç është më e madhe. Ai e sheh veten si lider i rajonit,” thotë analisti.

Sipas tij, kjo nismë vjen në një kohë kur BE nuk e pranon zyrtarisht, por nën zë diplomatët thonë se zgjerimi ka vdekur. Ndoshta Serbia dhe Mali i Zi mund t’ia dalin, por për zgjerimin nuk ka më shanse. Për këtë arsye po mendohet për alternativa ndaj integrimit në BE.