Vincenzo Montella ka paralajmëruar finale të zjarrtë ndaj Barcelonës në finalen e Copa del Reyt. Tekniku italian ka thënë se skuadra e tij ka treguar se di të luaj ndaj skuadrave të mëdha, duke aluduar në eliminimin që i ka bërë Manchester Unitedit në Ligën e Kampionëve.

Vincenzo ka treguar respekt të madh për Messin në deklaratë, por në të njëjtën kohë i ka bërë edhe një kërcënim.

“Jemi gati për një finale të zjarrtë në një terren neutral. Barcelona jo më kot është në vendin e parë, por edhe ne kemi treguar sivjet se dimë të luajmë në ndeshjet me skuadrat e mëdha. Kërcënimi më i madh për ne sigurisht që është Messi. Unë mendoj se ai është një jashtëtokësor, por nesër do të zbret në tokë nga ne. Kur Messi lejohet të marrë topa, është e pamundur ta ndalësh, por duhet ta pengojmë që të ketë topa” ka thënë Montella.