Një avokat në Durrës ka denoncuar se është dhunuar nga dy persona. Avokati Ilia Ilia thotë se është dhunuar para prokurorisë së Durrësit.
Ngjarja sipas policisë u shënua rreth orës 10:45 minuta të 19 korrikut, "në afërsi të Prokurorisë është goditur me sende të forta nga dy persona shtetasi I.I. me profesion avokat, i cili ndodhet në spital jashtë rrezikut për jetën" informon policia e Durrësit.
Pas kësaj ngjarje ai ka marrë mjekim në spital dhe më pas ka bërë denoncimin në polici.
Ilia Ilia: "Sot dola nga seanca gjyqësore, rreth orës 10:30 nga prokuroria. Më doli fillimisht një person përpara dhe më thotë: Ti je ai që i ke bërë karshillik prokurorit Arjan Ndoi. Nisi të thoshte fjalë fyese dhe sapo i lija çantën një tjetri më goditi. Kur më godit erdhi dhe personi tjetër. Dhe unë kundërveprova sa munda.
Avokati akuzon prokurorin
Avokati thotë se ka pasur një përplasje me prokurorin në seancë gjyqësore në kuadër të mbrojtjes së interesave të klientëve të mi.
"Përkundër reagimeve jo profesionale e jo etike, të prokurorit të çështjes ku ai aludoi në drejtim të integritetit tim moral unë i ktheva një përgjigje dhe i thashë: S'jam katunar si ty ti bëj këto gjëra. Dhe ai më kërcënoi në sallë dhe më tha se për këtë fjalë do bëhesh pishman shumë shpejt" shton avokati
Grupi hetimor po punon për identifikimin e autorëve dhe zbardhjen e plotë të rrethanave të ngjarjes.
Ndërkohë Ora News ka tentuar të kontaktojë me prokurorin e akuzuar, Arjan Ndoi por ka telefonin të fikur. Mësohet se grupi hetimor do të bëjë një ballafaqim mes dy personave.
