Për të dytën herë brenda vitit trupa teatrore e teatrit “Zhini Sako” e Gjirokastrës vjen në skenën e teatrit Kombëtar Eksperimental “Kujtim Spahivogli” në kryeqytet. Kësaj here është komedia "Çifti i hapur, gati i shqyer" nga Dario Fo dhe Franka Rame, që vjen premierë në skenën e Teatrit Kombëtar Eksperimental “Kujtim Spahivogli”, duke kërkuar suksesin tek publiku dhe kritka e speicalizuar. Komedia që shoqëron publikun këtë fundjavë është në skenë me aktorët Paola Xhafa, Aleksandër Kondi dhe regjisore Joana Omeraj. Komedia flet për çiftet, të cilët synojnë të jenë të hapur, një shfaqje e përcjellë në copëza humori. Regjisorja Omeraj pohon se është një komedi që duket sikur merret vetëm me konfliktin midis dy gjinive, por në fund kuptohet që nuk është mashkulli apo femra që sillen në këtë lloj mënyre, por njeriu dhe sjellja (toleranca) e tij në marrëdhënie me njerëzit e tjerë dhe bashkëshortin e bashkëshorten. “Një vepër aktuale që flet për marrëdhënien burrë e grua dhe jo vetëm, sepse është dhe për marrëdhënien e njerëzve mbi njëri tjetrin. Pra është shoqëria, rrethanat, koha që përcaktojnë sjelljen midis çiftit. Në fund zgjidhja është në dorë të publikut, a duhet të jemi "tolerant" dhe të pranojmë çdo gjë vetëm dhe vetëm për të qenë modern? Apo duhet që problemet të bisedohen që të kapërcehen? Njeriu çfarë do të bëjë në këtë rast?”, pohon regjisorja Omeraj. Vepra vjen në skenën e Teatrit Eksperimental mbrëmjet e datave 19 dhe 20 maj pas premierës në skenën e teatrit “Zihni Sako” në Gjirokastër. Kjo komedi është rivënë disa herë në skenën shqiptare, me regjisorë e aktorë të ndryshëm, duke nisur nga studentët e pedagogët e Universitetit të arteve, nën regjinë e Altin Bashës e deri së fundi nga teatri i Gjirokastrës.