“Procedurat” një film nga Ergys Meta dhe Suela Bako në kinematë e Tiranës nga data 25 maj. “Procedurat” një prodhim nga “Erafilm” është një film me dy histori të shkurtra faqe të së njëjtës monedhë: Në një shoqëri ku vlerat morale blihen dhe shiten të gjithë janë gjahtarë dhe viktima të njëri- tjetrit. Producenti Robert Budina bën me dije se ky film është realizuar me financimin e Qendrës Kombëtare të Kinematografisë në kuadrin e kategorisë së filmit indipendent. “Një falenderim i veçantë i shkon të gjithë trupës artistike, regjisorëve, aktorëve dhe trupës teknike, të cilët vunë mbi të gjitha pasionin”, bën me dije ai. “Procedurat” në pjesën e parë “Me duar në xhepa”, ka në qendër të historisë personazhin e Oliverit. Ai është një pianist i divorcuar, i papunë dhe i pashpresë. Oliver është i detyruar të kryejë veprime, që shkojnë në kundërshti me formimin e tij, për të shpëtuar nga borxhet që po i marrin frymën. Në pjesën e dytë “Një ditë si kjo”, në qendër të filmit është Soni. Gruaja bëhet dëshmitare e një padrejtësie, që i ndodh dikujt dhe ajo nuk reagon. Po si do të veprojë ajo kur e njëjta padrejtësi do t’i ndodhë vetë asaj? Projekti kinematografik ka bërë bashkë aktorë të njohur të filmit shqiptar. Ky film vjen në vijim të realizimit të tjerë projekteve kinematografike nga shtëpia kinematografike “Erafilm”. “Procedurat”, që vjen me dy histori shqiptare, realizim nga dy regjisorë i shtohet jetës artistike të Tiranë këto ditë, duke rikthyer në ekranin e kinemasë dhe emra aktorësh që prej vitesh mungonin për publikun. Pas kaq shumë vitesh në ekranin e madh të kinemasë vjen dhe aktori Xhelal Tafaj, këtë herë në rolin e inspektorit në filmin “Me duar në xhepa” nga Ergys Meta. Më tej në role janë dhe të tjerë aktorë si Pëllumb Dervishi, Marilda Furxhi, Naun Shundi, etj.