2 Maji shënon plot  19 vite që nga vrasja e 116 civilëve të pafajshëm nga forcat serbe. Sot e asaj dite ende nuk është vënë drejtësi për viktimat. Në shenjë përkujtimi për viktimat e masakrës së 2 majit të vitit 1999 në fshatin Studime të Vushtrrisë, zyrtarët e kësaj komune nën patronazhin e kryetarit Xhafer Tahiri përkujtojnë viktimat.

Ndërkohë, Presidenti i Kosovës, Hashim Thaçi nëpërmjet një statusi në Facebook ka kujtuar të ndjerët. Thaçi është shprehur se institucionet e Kosovës nuk do të ndalin asnjëherë zërin për zbardhjen e këtyre krimeve.

“Sot i kujtojmë 116 civilë të pafajshëm të vrarë nga forcat serbe para 19 vjetësh në Studime të Vushtrrisë. Si institucione të Republikës së Kosovës, nuk do të ndalim asnjëherë zërin për zbardhjen e krimeve të bëra nga forcat ushtarake dhe policore serbe. Nuk do të ndalemi deri sa të zbardhet fati i personave të pagjetur. Nuk do të ndalemi deri sa të dalin para drejtësisë autorët e krimeve. Lavdi të gjithë atyre që u sakrifikuan për liri!”, shkruan Thaçi në Facebook.