C.Ancelotti nuk e preferon si titullar, Napoli nuk ka ndërmend ti ofroj një rinovim të kontratës por e gjithë kjo tablo në dukje negative nuk është aspak problem për Hysaj për sa kohë ofertat për të nuk mungojnë, përkundrazi. Inter vijon të insistoj, Hysaj shihet si futbollisti ideal për ti besuar krahun e djathtë, nuk kanë hequr dorë kurrë nga kjo ide dhe ky është momenti i duhur për të paraqitur një ofertë konkrete.

Sipas FcInternews.it, Hysaj është shndërruar në prioritet absolut. Anësori i Kombëtares pëlqehet shumë nga Luciano Spalletti, mbi të gjitha nga ndihmësi i tij Martusciello, i cili ka punuar me Hysaj kur ishte pjesë e Empolit.

Palët, përfaqësues të Interit dhe menaxheri i Hysaj, kanë vendosur kontaktet e para, pritet që në ditët në vijim kjo tratativë të marrë dhe më shumë formë. Ndryshe nga se ishte parashikuar, ku mendohej se Napoli dhe menaxheri i Hysaj do të gjenin gjuhën e përbashkët për rinovimin e kontratës, gjithçka është ndalur që pas takimit të parë, në këto kushte Inter kërkon të përfitojë për të transferuar Hysajn në Milano. Për mbrojtësin e Kombëtares, Inter do të ishte një hap i madh për karrierën e tij.