Autoritetet në Serbi po vazhdojnë të kërcënojnë zyrtarët kosovarë. Kësaj radhe, kërcënimi vjen nga ministri i Punëve të Brendshme serb.
Ndërkohë që Serbia po mendon të hakmerrët ndaj arrestimit të Marko Gjuriç, duke paralajmëruar aktakuza ndaj Shpend Maxhunit, Flamur Sefajt e Jetlir Zymberajt , Kosova ka menduar të zgjedhë rrugën e drejtë të ankimit në strukturat e BE-së.
Jetlir Zymberajt shef i kabinetit të zv/kryeministrit Behgjet Pacolli, ka thënë se Kosova nuk është e befasuar me veprimet e tilla nga Serbia, dhe se kjo çështje do të ngrihet në nivelet më të larta të BE-së.
“Nuk jemi të befasuar me veprime të tilla nga Serbia. Ne kemi vepruar konfor legjislacionit dhe Kushtetutës së Republikës së Kosovës. Për mua e rëndësishme është që kemi respektuar dhe mbrojtur Kushtetutën e Kosovës”, tha shefi i kabinetit të zv/kryeministrit dhe ministrit të Punëve të Jashtme.
Ai tha se veprimet e tilla të Serbisë tregojnë prapë që ajo ende vazhdon praktikën e kallëzimeve politike të viteve të 90-ta dhe kjo është për keqardhje nga një vend kandidat i BE-së.
“Kjo dëshmon mungesën e vullnetit në Beograd me normalizu marrëdhëniet me Kosovën. Po presim verifikimin e lajmit dhe do ta ngremë në nivelet më të larta në BE”, tha Zymberaj.
Për këtë çështje ka reaguar ashpër edhe Këshilli për Mbrojtjen dhe të Drejtat e Njeriut (KMDLNJ).
Në një reagim të dërguar për media, të titulluar “Kur një shtet kriminal kërcënon liderët e shtetit tjetër”, KMDLNJ-ja thotë se autoritetet serbe po bëjnë politikë me dy e më shumë fytyra ndaj Kosovës, derisa në njërën anë po zhvillojnë bisedime për “normalizimin e raporteve” me Kosovën, në anën tjetër po ndërmarrin të gjitha veprimet për të shkatërruar Kosovën.
“...janë kërcënuar se do të arrestohen Shpend Maxhuni i pari i AKI-së (ish-drejtor i përgjithshëm i PK), Flamur Sefaj ish-ministër për Punë të Brendshme dhe Jetlir Zymberaj, këshilltar politik i Behgjet Pacollit sepse e paskan koordinuar arrestimin e një huligani politik siç ishte dhe është Marko Gjuriq”, thotë KMDLNJ.
Madje, Këshilli thotë se Marko Gjuriq, pas arrestimit, është dashur të dërgohet në Gjykatën Themelore të Mitrovicës dhe të gjykohet për kalim ilegal të kufirit, e jo të deportohet në Serbi, ashtu siç edhe ndodhi.
